ആലുവ: കുട്ടമശേരിയിൽ കാറിടിച്ച് പരിക്കേറ്റ വാഴക്കുളം സ്വദേശി നിഷികാന്തിന്‍റെ(ഏഴ്) ആരോഗ്യനില ഗുരുതരമായി തുടരുന്നു. ഓട്ടോയിൽ നിന്ന് തെറിച്ചുവീണ നിഷികാന്തിന്‍റെ ശരീരത്തിൽ പിന്നാലെ വന്ന കാർ കയറിയിറങ്ങുകയായിരുന്നു. കുട്ടിയെ ഇടിച്ച ശേഷം കാർ നിർത്താതെ പോയി. അന്വേഷണത്തിൽ കാറിന്‍റെ ഉടമയേയും സുഹൃത്തിനേയും ഇന്നലെ പിടികൂടി.
കാര്‍ ഓടിച്ചത് വാഹനത്തിന്‍റെ ഉടമയുടെ സുഹൃത്താണെന്ന് പോലീസ് പറഞ്ഞു. സംഭവത്തില്‍ നെടുമ്പാശേരി സ്വദേശി ഷാന്‍ പിടിയിലായി. കാറിന്‍റെ ഉടമയായ രജനിയുടെ സുഹൃത്താണ് ഇയാളെന്ന് ആലുവ ഡിവൈഎസ്പി എ. പ്രസാദ് പറഞ്ഞു. നേരത്തെ, കാര്‍ ഓടിച്ചത് ബന്ധുവാണെന്നായിരുന്നു രജനി പറഞ്ഞിരുന്നത്. അപകടവുമായി ബന്ധപ്പെട്ട് രജനിയേയും പോലീസ് കസ്റ്റഡിയിലെടുത്തിട്ടുണ്ട്. കുട്ടിയെ ഇടിച്ചത് താന്‍ അറിഞ്ഞില്ലെന്നാണ് കാര്‍ ഓടിച്ചയാളുടെ മൊഴി. അതേസമയം, അന്വേഷണത്തില്‍ വീഴ്ചയുണ്ടെങ്കില്‍ നടപടി സ്വീകരിക്കുമെന്ന് റൂറല്‍ എസ്പി പറഞ്ഞു.
കഴിഞ്ഞദിവസം രാവിലെ കുട്ടമശേരിയിൽ അച്ഛന്‍ പ്രജിത്ത് ഓടിച്ചിരുന്ന ഓട്ടോറിക്ഷയുടെ പിന്നിലിരുന്ന നിഷികാന്ത് റോഡിലേക്ക് വീഴുകയായിരുന്നു. ഓട്ടോയില്‍ നിന്ന് റോഡിലേക്ക് വീണ കുട്ടി എഴുന്നേല്‍ക്കാന്‍ ശ്രമിക്കുന്നതിനിടെ പിന്നില്‍ നിന്നും വന്ന കാര്‍ ഇടിക്കുകയായിരുന്നു. ഇടിച്ചശേഷം കാര്‍ നിര്‍ത്താതെ പോവുകയായിരുന്നു.
അപകടത്തില്‍ പോലീസിന്‍റെ അലംഭാവം വലിയ പ്രതിഷേധത്തിന് വഴിവച്ചിരുന്നു. സിസിടിവി ദൃശ്യങ്ങള്‍ കൈമാറിയിട്ടും വാഹനം കണ്ടെത്താന്‍ നടപടി സ്വീകരിച്ചിരുന്നില്ല. ഇന്‍സ്‌പെകടര്‍ക്ക് രേഖാമൂലം പരാതി നല്‍കാനാണ് പോലീസുകാര്‍ ബന്ധുക്കളോട് ആവശ്യപ്പെട്ടത്. സംഭവം വിവാദമായതിനെത്തുടര്‍ന്ന് നടത്തിയ അന്വേഷണത്തിലാണ് ബുധനാഴ്ച രാവിലെ 10 ന് കാര്‍ കണ്ടെത്തിയത്.
